Kubwayo Mc croix
Rutahizamu Gabriel Martinelli usanzwe ukinira ikipe y’Arsenal yujuje imikino 100 akinira iyi kipe muri shampiyona y’Ubwongereza Premier League ni nyuma y’umukino w’umunsi wa 9 wa shampiyona ubwo Arsenal yanganyaga na Chelsea ibitego 2-2 kuri uyu wa gatandatu.
Martinelli w’imyaka 22 ukomoka muri Brazil yageze mu ikipe y’Arsenal muri Nyakanga 2019 akaba ahembwa agera kubihumbi £180 ku cyumweru. Umukino wa mbere Martinelli yakiniye Arsenal muri Premier League hari tariki 11 Kanama 2019 ubwo yinjiraga mu kibuga ku munota wa 84 asimbuye, ni umukino Arsenal yatsinze Newcastle United igitego 1-0.
Mu mikino 100 Gabriel Martinelli amaze gukinira Arsenal muri Premier League yayitsindiye ibitego 27 atanga imipira 14 yavuyemo ibitego. Mu mikino 100 kandi yatsinze imikino 57 atsindwa imikino 22.
Gabriel Martinelli yabaye umukinnyi wa 65 ubashije gukinira ikipe y’Arsenal imikino 100 muri Premier League, niwe mukinnyi wa gatatu ukomoka muri Brazil ubashije kubikora nyuma ya Gilberto Silva na Gabriel Magalhaes bakinana kuri ubu.
