Umuhanzi Davido yavuze impamvu yambaye ikoti ryari ryanditseho amazina y’abarimu n’abanyeshuri bashimuswe bo muri Leta ya Oyo, ubwo yaririmbaga mu birori bya FIFA World Cup 2026.
Mu kiganiro yagiranye na BBC, Davido yavuze ko yahisemo gukoresha urwo rubuga rwarebwaga n’isi yose kugira ngo yibutse abantu ikibazo cy’ishimutwa ry’abana gikomeje guhangayikisha Nigeria.
Yagize ati: “Hari abantu bahitamo guceceka kugira ngo barinde isura yabo, ariko nta sura ikwiye kurindwa mu gihe abana bakomeje gushimutwa.”
Yakomeje avuga ko yabonaga ari inshingano ze gukoresha ijwi n’ubwamamare bwe mu gukangurira amahanga kutirengagiza icyo kibazo, aho yavuze ko nta kintu kiruta ubuzima n’umutekano w’abana.
Igikorwa cye cyashimwe na benshi ku mbuga nkoranyambaga, bavuga ko yakoresheje urubuga rw’imikino rurebwa n’amamiliyoni y’abantu kugira ngo atange ubutumwa bufite icyo busobanuye kuruta imyidagaduro.
