Umuhanzikazi nyarwanda Azina wakoranye indirimbo na Christopher agiye kurushingana n’umukunzi we (AMAFOTO+VIDEO)

Umuhanzikazi nyarwanda, Azina Amore utuye mu gihugu cy’u Bwongereza, agiye gukorera ubukwe ahitwa i Malindi, mu mujyi wa Mombasa ho muri Kenya.

Kuva uyu muhanzikazi yatangira gahunda z’urukundo, asa n’uwashyize ku ruhande iby’umuziki. Benshi mu bari bamwiteze mu muziki kuko yagaragazaga umuvuduko amaso yaheze mu kirere.

Amore azarushinga n’umusore witwa Uwimana Jean Luc uzwi nka Lucas, ku wa 13 Gashyantare 2021 i Malindi ho mu mujyi wa Mombasa muri Kenya.

Uyu musore ugiye kurushinga na Amore nubwo atazwi cyane mu myidagaduro yo mu Rwanda, hari amakuru ahamya ko mu myaka ishize yabaye umuyobozi wa Berwa Fashion, itsinda ry’abamurika imideli.

Azina Amore yamenyekanye mu myaka itanu ishize ubwo yinjiraga ku rutonde rw’abahanzi bakorera umuziki muri Diaspora y’Abanyarwanda batuye mu Bwongereza.

Icyo gihe yakoze indirimbo zirimo; Byigumanire yakoranye na Christopher, Die for you yakoranye na Big Fizzo, Si nka ba bandi n’izindi.