Mu minsi ishize, rutahizamu wa FC Barcelona n’Ikipe y’Igihugu ya Brésil, Raphinha, yisanga mu nkuru ziri gukwirakwizwa cyane ku mbuga nkoranyambaga zivuga ko yaba afite ibibazo by’amafaranga ndetse ko yaje gutungurwa no gusanga igice kinini cy’amafaranga ye cyaracungwaga n’umuryango we.
Ibi byatangiye gukomera nyuma y’amagambo yavuzwe n’uwahoze ari umukinnyi wa Brésil, Vampeta, wavugiye kuri podcast ya Red Cast ko Raphinha yaba afite ibibazo by’imbere mu muryango n’iby’ubukungu, ndetse ko byanagira ingaruka ku migambi ye y’ahazaza mu mupira w’amaguru.
Inkuru zakwirakwijwe zishingiye ku byatangajwe na Vampeta n’iperereza rya bamwe mu banyamakuru bo muri Brésil zivuga ko Raphinha na we n’umugore we bashobora kuba barigeze gutungurwa no gusanga amafaranga atari ku rwego bari biteze, cyane cyane mu gihe bageragezaga kugura inzu ihenze. Ibyo byahujwe n’amakuru avuga ko hafi 80% by’amafaranga yaturukaga ku masezerano y’ubucuruzi (image rights) byajyaga ku mubyeyi we, Rafael Belloli, wari unacunga inyungu ze za kera.
Ibi bihuha ntibyatinze guhakanwa n’umuryango we. Umugore wa Raphinha, Natália Belloli, yavuze ko ayo makuru atari ukuri, agaragaza ko ubuzima bwabo bw’imari butigeze bugira ibibazo nk’uko bivugwa. Yagize ati ko n’iyo baba binjiza 10% gusa by’amafaranga ya Raphinha, baba bakiri mu buzima bwiza cyane. Nanone, abantu bo mu muryango we barimo na mubyara we bagaragaje ko ibivugwa ari ibihuha bidafite ishingiro, basaba ko abantu bakwiye kwirinda gukwirakwiza inkuru zitaremezwa.
Ikinyamakuru Hindustan Times cyagaragaje ko nubwo hari ibivugwa ku mpinduka mu micungire y’umutungo wa Raphinha n’imikoranire n’umuryango we, nta kigo na kimwe gikomeye cyigeze cyemeza ko yahuye n’ibibazo bikomeye by’amafaranga cyangwa ko hari amafaranga yanyerejwe mu buryo butemewe.
Ibi bituma inkuru ivuga ko Raphinha yaba yarasigiwe “konti irimo ubusa” ifatwa nk’iyubakiye ku bihuha, aho ibice byayo bishingiye ku makuru ataremezwa neza.
Kugeza ubu, Raphinha akomeje ubuzima bwe busanzwe bw’umupira w’amaguru, mu gihe inkuru zimwerekeyeho zikomeje kugenzurwa n’itangazamakuru mpuzamahanga.
