HARAGIRIMANA Dieudonne
Uwayezu Jean Fidel uyobora ikipe ya Rayon Sports yavuze amagambo akomeye kuri bamwe mu bafana b’iyi kipe batagira imyitwarire itari myiza.
Uyu munsi tariki 28 Mutarama 2023, imbaga nyamwinshi y’abakunzi ndetse n’ubuyobozi bwa Rayon Sports buyobowe na Uwayezu Jean Fidel bakoreye umuganda mu karera ka Nyanza basanzwe bakorera umuganda kenshi usoza ukwezi.
Nyuma y’uyu muganda umuyobozi wa Rayon Sports yahaye ikiganiro umunyamakuru wa Radio 10. Muri iki kiganiro uyu muyobozi yagarutse kuri rutahizamu mushya Joachim Ojera waraye aguzwe, avuga ko ari umukinnyi mwiza kandi uzabafasha cyane.
Jean Fidel yanavuze ku kuntu ikipe yiteguye umukino urabahuza n’ikipe ya Mukura Victory Sport uyu munsi, avuga ko abasore ba Rayon Sports biteguye neza kandi bagomba kubona intsinzi nkuko babikoze ku mukino wa mbere ufungura imikino yo kwishyura batsinda ikipe ya Musanze FC bayinyagiye ibitego 4-1 mu mukino abakinnyi ba Rayon Sports bakoresheje imbaraga nyinshi cyane.
Uwayezu Jean Fidel yaje no kuburira abafana ba Rayon Sports, ababwira ko bagomba kugira imyitwarire myiza bakishimira ibivuye ku kibuga byaba byiza cyangwa bibi, naho bitabaye ibyo umufana uzabirengaho ngo azahanwa mu buryo bukomeye cyane mbere yo kumujyana mu zindi nkiko.
Ibi yabitangaje nyuma y’ibihano abafana b’ikipe ya Kiyovu Sports bamaze iminsi bahawe kubera gutuka bikomeye umusifuzi Mukansanga Salim wabasifuriye umukino wahuje iyi kipe ndetse na Gasogi United.
