THIERRY Mugiraneza
Ikipe ya Manchester United yasubukuye Premier League neza ubwo yitwaraga neza imbere ya Nottingham Forest mu gihe na Chelsea yongeraga kwiyunga n’abafana bayo.
Manchester United yari yakiriye Nottingahm Forest kuri Old Trafford mu mukino wabaye saa yine z’ijoro kuri uyu wa kabiri , Manchester United iyitsinda ibitego bitatu ku busa mu mukino w’umunsi wa 16 wa Premier League ñyuma y’igihe cy’ukwezi kurenga idakinwa kubera igikombe cy’isi.
Erik Ten Hag utoza Manchester United yariyahisemo kubanza mu kibuga bakinnyi nka De Gea; Wan-Bissaka, Varane, Shaw, Malacia; Casemiro, Eriksen; Antony, Bruno Fernandes, Rashford na Martial.
Mu gihe Nottingahm yo yari yabanje mu kibuga Hennessey; Aurier, Worrall, Boly, Renan Lodi; Yates, Mangala, Freuler; Johnson, Awoniyi na Lingard wari wagarutse mu rugo.
Ibitego bitatu bya Manchester United byatsinzwe na Rashford ku munota wa 19 ku mupira mwiza wari utewe na Eriksen uvuye muri koroneli , Martial nawe yaje gutsinda igitego cya kabiri ku munota wa 22 ahawe umupira na Rashford maze Fred atsinda agashinguracumu ku munota wa 87 ubwo Casemiro yamucomokeraga umupira mwiza.
Chelsea nayo yasubukuye urugendo rwa Premier League yerekana ko igarukanye intego zikakaye.
Chelsea yatsinze Bournemouth ibitego bibiri ku busa mu mukino wabereye ku kibuga cya Chelsea i Stamford Bridge utangira saa moya n’igice z’umugoroba kuri uyu wa kabiri.
Graham Potter utoza Chelsea yari yitwaje ibikurankota bye birimo Arrizabalaga, Cucurella, James, Koulibaly, Thiago Silva, Zakaria, Jorginho, Mount, Sterling, Pulisic na Havertz.
Mu gihe Bournemouth yari yabanje mu kibuga Travers, Senesi, Smith, Zemura, Kelly, Billing, Lerma, Cook, Stacey, Solanke na Moore.
Ibitego bibiri bya Chelsea byatsinzwe na Kai Havertz ku munota wa 16 ahawe umupira na Rahem Sterling ndetse na Mason Mount atsinda igitego cya kabiri ku munota wa 24 ahawe umupira na Kai Havertz.
Umunsi wa 16 usize Manchester United iri ku mwanya wa 5 n’amanota 29 ikava izigamye ibitego 3 mu mikino 15 imaze gukina. Chelsea yo iri ku mwanya wa munani n’amanota 24 mu mikino 15 imaze gukina ikazigama n’ibitego bibiri.
