Rutahizamu Essomba Onana ushinjwa ubugambanyi n’abafana ba Rayon Sports yahishuye umubare w’ibitego azinjiza mu izamu rya APR FC

Rutahizamu Mpuzamahanga ukomoka mu gihugu cya Cameroon, Essomba Leandre Willy Onana yatakambiye umutoza Haringingo Francis Christian amusaba ko yazamubanza mu kibuga ku mukino bazahuramo na mucyeba APR FC.

Ku Cyumweru tariki 12 Gashyantare 2023, shampiyona y’Icyiciro cya Mbere umwaka w’imikino wa 2022-2023 izakomeza ku munsi wayo wa 19 aho APR FC izakira Rayon Sports kuri Stade Mpuzamahanga y’i Huye.

Mu myitozo yo kuri uyu munsi Essomba Leandre Willy Onana yabwiye umutoza Haringingo Francis Christian ko namubanza mu kibuga azatsinda ibitego bitari munsi ya bibiri.

Amakuru YEGOB yamenye ni uko Essomba Onana azabanza mu kibuga cyo kimwe n’abandi bakinnyi b’Abanyamahanga bane ari bo Heritier Luvumbu Nzinga, Joachiam Ojera, Mousa Camara na Musa Esenu.

Rayon Sports iheruka gutsinda APR FC tariki 21 Mata 2019, icyo gihe yayitsinze igitego kimwe ku busa cyabonetse ku munota wa nyuma gitsinzwe na Michael Sarpong kuri penaliti nyuma y’ikosa Imanishimwe Emmanuel myugariro wa APR FC yakoreye kuri Mugisha Gilbert wari mu rubuga rw’amahina.