YegoB
Byatwaye iminota umunani gusa ngo Manchester City itsinde igitego cya 500 itozwa n’umutoza Pep Guardiola ku mukino wabahuzaga na Leeds United mw’ijoro ryo kuwa kabiri.
Phil Foden niwe watsindiye Man City icyi gitego cya 500 iyi kipe kuva yaha akazi Pep Guardiola avuye muri Bayern Munich.
Phil Foden yaje guha ikipe ya Manchester City kuyobora umukino kuri Etihad Stadium ubwo bageraga kuri kano gahigo batozwa n’uyu mutoza.
Byatwaye Foden iminota umunani gusa ngo abe yanditse amateka ubwo yateraga umupira muruncundura ari mu rubuga rwa Penaliti nyuma yaho umunyezamu Illan Meslier yari amaze gukuramo ishoti rikomeye ryari kuvamo igitego ryari ritewe na Rodri.
Manchester City byayisabye imikino 207 gusa Kugira ngo itsinde igitego cya 500, iza imbere ya Liverpool yo byatwaye imikino 234 ngo nayo itsinde ibitego nkibi itozwa n’umutoza Jurgen Klopp.
Uza hafi kuri urwo rutonde ni umutoza mukuru wari uwa Manchester United, Sir Alex Ferguson we byatwaye imikino 265 agakurikirwa na Arsene Wenger watozaga ikipe ya Arsenal we byatwaye imikino 271 ngo ikipe ye itsinde Igitego cya 500.
Ku mwanya wa Gatanu hazaho umutoza,Jose Mourinho we byasabye imikino 289 atoza ikipe ya Chelsea ngo itsinde igitego cya 500, naho Rafa Benitez nawe atoza ikipe ya Liverpool byamusabye imikino 329 gusa ku mwanya wa Gatandatu ngo ikipe ya Liverpool itsinde igitego cya 500 kungomw ye
Rutahizamu Sergio Aguero, wavuye muri iyi kipe ya Man City ku mpera z’umwaka w’imikino ushize, niwe watsindiye iyi kipe ibitego byinshi kuri iyi Manda ya Pep Guardiola, mu myaka itanu n’igice bamaranye Aguero yatsinze ibitego 82 wenyine kw’izina rye gusa nyuma yo gusohoka muri iyi kipe ntiyaje guhirwa kuko uyu munsi kw’isaha ya saa Munani biteganyijwe ko aza gutangaza ko asezeye burundu kuri ruhago nyuma yo kugira ikibazo cy’umutima, bivugwa ko Pep Guardiola aza kuba ari muri icyi kiganiro n’itangaza makuru mu rwego rwo gushyigikirwa uyu rutahizamu.
Raheem Sterling nawe yagize uruhare rukomeye muri ibi bitego we ubwe atsinda ibitego 76, rutahizamu Gabriel Jesus atsinda ibitego 52, Kevin De Bruyne atsindamo ibitego 37 na Ilkal Gundouga atsinda ibitego 31 muri abo bakinnyi bagerageje gutsinda ibitego 30 no kurenza.
Umwaka w’imikino ikipe ya Manchester City yatsinze mo ibitego byinshi itozwa n’umutoza Pep Guardiola ni umwaka wa 2017-18 ubwo batsindaga ibitego byose hamwe bingana n’ibitego 106.
