Hamenyekanye akavagari k’amafaranga Heritier Luvumbu yategewe na Rayon Sports naramuka abashije kwinjiza igitego mu izamu rya APR FC

Ikipe ya Rayon Sports yijeje Heritier Luvumbu Nzinga agahimbazamusyi kangana n’ibihumbi 500 by’Amanyarwanda mu gihe azaba ashoboye kwinjiza igitego mu izamu rya APR FC.

Ku Cyumweru tariki 12 Gashyantare 2023, ikipe ya APR FC izakira Rayon Sports mu mukino w’umunsi wa 19 wa shampiyona y’Icyiciro cya Mbere umwaka w’imikino wa 2022-2023 uzabera kuri Stade Mpuzamahanga y’i Huye.

Amakuru yizewe YEGOB yamenye ni uko bamwe mu bahoze bayobora Rayon Sports bategeye Heritier Luvumbu Nzinga ibihumbi 500 naramuka abashije gutsinda igitego, mu gihe yakwinjiza ibitego bibiri azahabwa miliyoni y’Amanyarwanda.

Rayon Sports iheruka gutsinda APR FC tariki 21 Mata 2019, icyo gihe yayitsinze igitego kimwe ku busa cyabonetse ku munota wa nyuma gitsinzwe na Michael Sarpong kuri penaliti nyuma y’ikosa Imanishimwe Emmanuel myugariro wa APR FC yakoreye kuri Mugisha Gilbert wari mu rubuga rw’amahina.