Kubwayo Mc croix
Mu mukino wa Copa America wabaye muri Nyakanga uyu mwaka, Ronald Araujo, myugariro w’ikipe ya FC Barcelona n’ikipe y’igihugu ya Uruguay, yavunikiye mu mukino bahuragamo na Brazil. Isuzuma ryakozwe nyuma ryemeje ko azamara amezi ane adakandagira mu kibuga, akaba ateganyijwe kugaruka muri uku kwezi.
Impuzamashyirahamwe y’umupira w’amaguru ku Isi (FIFA) igiye guha FC Barcelona indishyi y’amafaranga agera kuri miliyoni 3 z’Amayero, hashingiwe ku mategeko yayo ateganya indishyi ku bakinnyi bavunikiye mu makipe y’ibihugu bakamara igihe kirenze iminsi 28 badakina. Ku munsi, ikipe igenerwa ibihumbi 20 by’Amayero.
Si ubwa mbere Barcelona ibona iyi ndishyi, kuko umwaka ushize yahawe miliyoni 6 z’Amayero kubera imvune ya Gavi ndetse n’ibihumbi 300 by’Amayero kuri Pedri wavunikiye mu mikino ya Euro 2024. Bivuze ko muri uyu mwaka Barcelona imaze kubona indishyi zigera kuri miliyoni 9 z’Amayero kubera abakinnyi bayo batatu bavunitse.
