Arsenal ibaze Tottenham Hotspurs nta kinya!

Arsenal yatsinze Tottenham Hotspurs ibitego bibiri ku busa mu mukino w’umunsi wa 20 wa Premier League mu kiswe North London Deby.
Uyu mukino watangiye saa kumi n’ebyiri n’igice z’umugoroba ubera kuri Tottenham Hotspurs Stadium, ikibuga Tottenham yakiruraho imikino yayo.

Antonio Conte utoza Tottenham yari yabanjemo Lloris; Romero, Dier, Lenglet; Doherty, Sarr, Hojbjerg, Sessegnon; Kulusevski, Son na Kane.
Iminota 10 ya mbere y’umukino yihariwe na Arsenal kuko byibuze muri iyo minota , Arsenal yabonyemo koroneli imwe, batera imipira itatu igana mu izamu harimo umutwe watewe na Partey ndetse n’ishoti ryatewe na Edie Nketiah.

Mikel Arteta utoza yari yabanje mu kibuga Arsenal Ramsdale, White, Saliba, Gabriel, Zinchenko, Partey, Xhaka, Odegaard, Saka, Martinelli na Nketiah.
Arsenal yari yahatse Tottenham yaje kubona igitego cya mbere ku munota wa 15 ubwo Bukayo Saka yarekuriraga ishoti ku ruhande Hugo Lloris yagerageza kuwukuraho akitsinda.

Tottenham yabaye nk’ikanguka nayo ñyuma yo gutsindwa igitego Heung Son arekura umuzinga w’ishoti ariko umuzamu was Arsenal awukuramo.
Arsenal yari yisize insenda yongeye guhusha igitego ubwo Tomas Partey yoherezaga icumu ry’ishoti, umupira ukagenda ugakubita igiti k’izamu ukagaruka.
Ku munota wa 36 Arsenal yateye umusumari wa kabiri muri Tottenham, ubwo Martin Ødeggard yarekuraga ishoti riremereye cyane umuzamu ntiyakurikira.
Igice cya mbere cyarangiye Arsenal ir’imbere n’ibitego bibiri ku busa bwa Tottenham Hotspurs.

Igice cya kabiri cyatangiranye n’imbaraga ku ruhande rwa Tottenham, ku munota wa 47 Harry Kane yarekuye ishoti riremereye ubwo yari mu rubuga rw’amahina rwa Arsenal ariko umuzamu wa Arsenal awukuramo. Ramsdale yongeye kurokora Arsenal ku munota wa 59 ubwo Harry Kane yacomokerega umupira Sessegnon ariko yawutera Ramsdale agatambika ikirenge umupira akawukuraho.

Tottenham yakomezaga yataka ariko Ramsdale akaba ibamba.
Umukino warangiye Arsenal itsinze ibitego bibiri ku busa, ihamya n’umwanya wa mbere.