Josimar José Évora Dias, uzwi nka Vozinha, umuzamu w’ikipe y’igihugu ya Cape Verde ufite imyaka 40, yabaye umwe mu bakinnyi bavuzweho cyane mu Gikombe cy’Isi cya FIFA 2026, nyuma yo gukora ibisa nkibidashoboka mu mukino Cape Verde yakiranye na Espanye ku itariki ya 15 Kamena, umukino warangiye amakipe yombi anganyije ubusa kubusa. Vozinha, wari waranatangiye umwuga we nk’umukozi w’amashanyarazi kandi akanatwara amabisi mu birwa bya Cape Verde, ntabwo yabaye umukinnyi w’umwuga kugeza afite imyaka 25.
Nyuma y’uwo mukino, uwahoze afite abamukurikira ku mbuga nkoranyambaga Instagram bagera ku 50,000 gusa, mu masaha make yiyongereye agera kuri miliyoni zirenga. Ku mpera z’igikombe, umubare w’abamukurikira wari umaze kurenga miliyoni 20, urenza uw’inyenyeri z’umukino wa NFL nka Tom Brady na Patrick Mahomes. Ibi byatumye impuguke z’ubucuruzi zivuga ko Vozinha yaba yarahaye Cape Verde agaciro k’ubucuruzi kagera kuri miliyoni 17.7 z’amadolari binyuze mu itangazwa rye ku mbuga nkoranyambaga no mu binyamakuru.
Ku ruhande rw’amafaranga y’umwuga, agaciro ka Vozinha ku isoko ry’abakinnyi (transfer value), nk’uko bigaragazwa na Transfermarkt, ni hafi amadolari 50,000 ari na cyo kigereranyo cy’agaciro ke nk’umukinnyi. Iki gipimo kiratandukanye cyane n’imishahara ivugwa ku bakinnyi bakomeye nka Cristiano Ronaldo na Lionel Messi, bavugwa ko binjiza amamiliyoni y’amadolari ku mwaka binyuze mu masezerano yabo n’amakipe hamwe n’ubucuruzi bwihariye (sponsorship), nubwo imibare nyayo itangwa n’ibigo bitandukanye idahuye burundu.
Kubera yari afite amasezerano na Chaves, ikipe yo muri Portugal, yarangiye muri iki cyumweru, Vozinha ubu ni umukinnyi wigenga , bikaba byatumye ibigo byinshi bimwitegereza kubera ubushobozi bwe no kumenyekana ku isi hose bwavutse nyuma y’ibikorwa bye byaranze Igikombe cy’Isi.
