Ikipe y’igihugu ya Misiri yanditse amateka yo kugera muri 1/8 cy’Igikombe cy’Isi cya 2026 nyuma yo gusezerera Australia iyitsinze penaliti 4-2, nyuma y’uko amakipe yombi yari yanganyije igitego 1-1 mu minota 120 y’umukino.
Uyu mukino wa 1/16 wabereye kuri Dallas Stadium watangiye Misiri yihagazeho, maze ku munota wa 13 Emam Ashour afungura amazamu ku mupira yahawe na Karim Hafez. Misiri yakomeje kurinda uwo musaruro kugeza igice cya mbere kirangiye iyoboye n’igitego 1-0.
Mu gice cya kabiri, Australia yagerageje gusatira ishaka kwishyura maze ku munota wa 55 ibona igitego cyatewe na Mohamed Hany wari witsinze mu izamu rye, bituma amakipe yombi anganya 1-1.
Nta kipe yongeye kubona igitego mu minota isanzwe ndetse no mu y’inyongera, bituma hifashishwa penaliti kugira ngo haboneke ikipe ikomeza.
Mu gutera penaliti, Misiri yarushije Australia ituze. Mahmoud Saber, Ramy Rabia, Mohamed Salah na Hossam Abdelmaguid bazinjije penaliti zabo zose, mu gihe Australia yahushije ebyiri zirimo iya Harry Souttar n’iya Lucas Herrington. Byatumye Misiri itsinda penaliti 4-2 ikatisha itike ya 1/8 cy’Igikombe cy’Isi.
Misiri izahura n’izava hagati ya Argentine na Cape Verde mu mukino wa 1/8, ikomeje gutanga icyizere cyo gukora amateka muri iri rushanwa riri kubera muri Amerika, Canada na Mexique.
