Ikipe y’Igihugu ya Maroc yakomeje kwerekana ko ari imwe mu makipe akomeye muri FIFA World Cup 2026, nyuma yo gutsinda Canada ibitego 3-0 mu mukino wa 1/8 cy’irangiza wabereye i Houston, ihita ibona itike ya 1/4 cy’irangiza.
Igice cya mbere cyarangiye amakipe yombi anganya 0-0, nubwo Canada yari ifite abafana benshi bayishyigikiye ndetse ikagerageza gushaka igitego. Ariko ubwugarizi bwa Maroc buyobowe na Yassine Bounou bwakomeje guhagarara neza.
Mu gice cya kabiri ni bwo Maroc yerekanye urwego rwayo. Ku munota wa 50, Azzedine Ounahi yafunguye amazamu ku mupira mwiza yari ahawe na Achraf Hakimi, ibintu byahaye Maroc icyizere cyo gukomeza.
Canada yakomeje gusatira ishaka kwishyura, ariko uburyo yabonaga bwose bwaburizwagamo n’ubwugarizi bwa Maroc ndetse n’umuzamu Bounou wakuyemo imipira ikomeye.
Ku munota wa 82, Brahim Díaz yatangije uburyo bwihuse bwabyaye igitego cya kabiri, maze Ounahi atsinda igitego cye cya kabiri muri uyu mukino, ashyira Maroc ku ntsinzi yari igoye ko yakwamburwa.
Mu minota y’inyongera, ku munota wa 90+8, Soufiane Rahimi yatsinze igitego cya gatatu ku mupira mwiza yahawe na Brahim Díaz, ashimangira intsinzi ya Maroc.
Iyi ntsinzi yahise ituma Maroc iba ikipe ya mbere igeze muri 1/4 cy’irangiza cy’Igikombe cy’Isi cya 2026. Izahura n’izava hagati y’u Bufaransa na Paraguay mu rugamba rwo gushaka itike ya 1/2.
Ku rundi ruhande, urugendo rwa Canada rwahagarariye muri 1/8 cy’irangiza. Nubwo yasezerewe, yagaragaje umupira mwiza ndetse ishimisha abafana bayo mu Gikombe cy’Isi cyabereye ku butaka bwa Amerika y’Amajyaruguru.
Maroc yongeye kwerekana ko ari imwe mu makipe akomeye ahagarariye Afurika, ikomeza inzozi zo kugera kure muri iri rushanwa rikomeye kurusha ayandi ku Isi.
