Ikipe y’Igihugu ya Argentina ibitse Igikombe cy’Isi yakomeje urugendo rwo kugis defenda nyuma yo gutsinda Cape Verde ibitego 3-2 mu mukino w’ishiraniro wamaze iminota 120, wabereye kuri Miami Stadium mu ijoro ryo ku wa Gatanu.
Argentina ni yo yafunguye amazamu ku munota wa 29, igitego cyabonetse ku mupira wari utewe na Lionel Messi, Lisandro Martínez akawukozaho mbere yo kujya mu izamu.
Cape Verde yanze gucika intege, maze ku munota wa 59 Deroy Duarte yishyura igitego, amakipe yombi asoza iminota 90 anganya 1-1, bituma hakinwa indi minota 30 y’inyongera.
Mu minota y’inyongera, Lisandro Martínez yongeye guha Argentina imbere ku munota wa 92, ariko Sidny Cabral yongera kwishyurira Cape Verde ku wa 103 n’ishoti rikomeye ryatumye umukino urushaho gukomera.
Icyakora, ku munota wa 111, umupira wari utewe na Lionel Messi wateje urujijo mu rubuga rw’amahina, Diney Borges wa Cape Verde awukozaho ujya mu izamu, icyo gitego cyandikwa nk’icyitsinzwe (own goal), biha Argentina intsinzi y’ibitego 3-2.
Nubwo yasezerewe, Cape Verde yigaragaje nk’imwe mu makipe yatunguye benshi muri iri rushanwa, ihangana n’ikipe ya kabiri ku rutonde rwa FIFA kugeza ku munota wa nyuma.
Nyuma y’iyi ntsinzi, Argentina yakatishije itike ya 1/8 cy’Igikombe cy’Isi cya 2026, aho izahura na Misiri (Egypt) mu mukino utegerejwe na benshi.
