Umuhanzi uvuka muri Nigeria Burna Boy yongeye kuvugisha benshi nyuma y’amakuru avuga ko yamaze kwakira imodoka ya Bugatti Chiron Venuum Widebody yakozwe mu buryo bwihariye , ifite agaciro karenga miliyoni 5.8 z’amadolari ya Amerika (asaga miliyari 9 Frw).
Iyi modoka bivugwa ko ari yo yonyine imeze gutya ku isi, kuko yakozwe hakurikijwe ibyifuzo bya Burna Boy ubwe. Ifite igishushanyo cyihariye, ubuso bwagutse ndetse n’ibikoresho bigezweho bituma iba imwe mu modoka zihenze kandi zidasanzwe z’abantu ku giti cyabo muri Afurika y’Iburengerazuba.
Bugatti Chiron isanzwe izwi nk’imwe mu modoka zihuta cyane ku isi, ifite moteri ya 8.0L W16 Quad-Turbo itanga imbaraga zigera ku 1,500 horsepower, kandi ishobora kurenga 420 km/h. Iyi verisiyo ya Burna Boy yongeweho impinduka zidasanzwe zituma iba ntagereranywa n’indi Bugatti iyo ari yo yose.
Mu myaka ishize Burna Boy yakomeje kwagura umutungo we binyuze mu muziki, ibitaramo mpuzamahanga ndetse n’amasezerano y’ubucuruzi. Kuba yaguze iyi Bugatti idasanzwe byongeye kwerekana urwego amaze kugeraho, ndetse bikomeza kumushyira mu byamamare bya Afurika bifite imodoka zihenze kurusha izindi.
