Umukinnyi wa APR FC yanenze bikomeye ba myugariro ba Rayon Sports yemeza ko azabazonga akabanyagira ibitego byinshi bizashengura imitima y’abakunzi ba Gikundiro

Umukinnyi w’umuhanga mu ikipe ya APR FC, Ishimwe Annicet yemeje ko nta myugariro Rayon Sports ifite uzamugora, akaba yijeje umutoza Ben Moussa ko azabasha kunyeganyeza inshundura nk’uko asanzwe abikora muri uyu mukino w’ishiraniro.

Harabura amasaha macye ngo amakipe y’amacyeba agacakirana mu mukino w’umunsi wa 19 wa shampiyona y’Icyiciro cya Mbere umwaka w’imikino wa 2022-2023 uzabera kuri Stade Mpuzamahanga y’i Huye.

Abakinnyi ba APR FC barimo Ishimwe Annicet yijeje umutoza Ben Moussa ko azatsinda igitego, ni nako Byiringiro Lague yiyemeje kuzatsinda ibitego agasigira intimba abakunzi ba Rayon Sports ari nako azaba asize ibyishimo bitazibagirana mu mitima y’abakunzi ba APR FC.

Rayon Sports iheruka gutsinda APR FC tariki 21 Mata 2019, icyo gihe yayitsinze igitego kimwe ku busa cyabonetse ku munota wa nyuma gitsinzwe na Michael Sarpong kuri penaliti nyuma y’ikosa Imanishimwe Emmanuel myugariro wa APR FC yakoreye kuri Mugisha Gilbert wari mu rubuga rw’amahina.