HARAGIRIMANA Dieudonne
Umujura yakubiswe n’abaturage ubwo yashakaga kubarwanya bamufashe yiba.
Ibi byabereye mu murenge wa Jabana,Akarere ka Gasabo kuri uyu wa Mbere tariki 8 Kanama 2022, nyuma yo gufatirwa mu rugo rumwe rwo mu Mudugudu w’Akayenzi mu kagari ka Kamatamu.
Abobonye ibyabaye bemeza ko uyu mugabo ukekwaho ubujura batamuzi muri aka gace. Bafashe umwanzuro wo kumwihanira nubwo bitemewe, nyuma yo kumufata yiba agashaka kubarwanya no kubatera ibyuma.
Umugore yari yibye we yagize ati “ Nari nagiye ku mugezi nsiga naryamishije umwana mu nzu, nje nsanga uyu mugabo ari mu cyumba ari gupakira imyenda, nibwo yashatse kuncika mvuza induru abaturage baratabara baramufata baramuzirika.”
Undi muturage wagize uruhare mu gufata uyu mujura yagize ati “Uriya mugore yahise avuza induru tuzamuka twiruka ahita yurira igipangu, bamufashe akaguru ahita agwa hasi.”
Umujura amaze kubona bamugose kandi atagishoboye kwiruka, yafashe ibuye arikubita uwo mugore anashaka kurwanya abandi baturage bari batabaye biba ngombwa ko bamuzirika amaguru.
