Hashize igihe kinini abafana b’ikipe ya Arsenal binginga Wenger ngo agure rutahizamu mushya wo kunganira Olivier Giroud, ubu ngubu rero birasa naho ibyifuzo byabo byumviswe kuko biravugwako Arsenal igiye kugura Rutahizamu mushya mu masaha make ari imbere.
Nkuko ibinyamakuru byo mu bwongereza bibitangaza ngo ikipe ya Arsenal yaba yamaze kumvikana n’ikipe ya Deportivo La Corogne kuri rutahizamu wayo Lucas Perez w’imyaka 27 y’amavuko.
Lucas Perez wabashije gutsinda bitego 17 mu mikino 36 yakinnye saison ishize ngo akaba agiye kugurwa miliyoni 20 z’amayero, uyu mukinnyi rero akaba atara nahamagawe mu ikipe ya Deportivo La Corogne izakina na Betis Seville muri week end ibyo rero akaba ari ibishimangira ko ashobora gusesekara Emirates mu masaha make.
Arsenal rero ntiyarekeye aho kuko bivugwa ko yaba igiye kwibikaho na myugariro yari amaze iminsi ishakisha witwa Skhodran Mustafi. Uyu musore w’imyaka 24 y’amavuko bikaba bivugwa ko agiye kuva muri Fc Valence yerekeza muri Arsenal kuri miliyoni 40 z’amayero (40 M€).
