Umukinnyi wa filime akaba n’umushoramari, Idris Elba, yafatanyije na Google gutangiza gahunda ifite agaciro ka Miliyoni imwe y’Amadolari ya Amerika ($1 million), igamije gufasha abanyabugeni n’abakora ibikubiyemo digital bagera ku 100,000 bo muri Afurika kubona ibikoresho bigezweho bikoresha ubwenge buhangano (AI).
Iyi gahunda yatangarijwe mu nama ya Google AI Summit yabereye i Johannesburg muri Afurika y’Epfo, ikazagirira akamaro abakora ibihangano bo muri Nigeria, Ghana, Kenya, Sierra Leone na Afurika y’Epfo. Abazayungukiramo bazahabwa uburyo bwo gukoresha Google Gemini n’ibindi bikoresho bya AI bizabafasha gukora ibihangano byiza, kongera umusaruro no kugabanya ikiguzi cyo kubitunganya.
Mu ijambo rye, Idris Elba yavuze ko Afurika idafite ikibazo cyo kubura impano, ahubwo ikibazo ari ukubura amahirwe n’ibikoresho bifasha izo mpano gutera imbere. Yagaragaje ko gukoresha AI bishobora gufasha abanyabugeni bo ku mugabane wa Afurika guhangana ku rwego mpuzamahanga no kugeza ibikorwa byabo ku isoko rinini.
Iyi gahunda ije mu gihe urwego rw’ubuhanzi n’ibikorwa byo guhanga muri Afurika rukomeje kuzamuka, aho rutanga umusanzu urenga miliyari 58 z’Amadolari ku bukungu bwa Afurika yo munsi y’Ubutayu bwa Sahara. Google yavuze ko ubu bufatanye ari imwe mu ntambwe zigamije gufasha urubyiruko rw’Afurika gukoresha ikoranabuhanga mu kubyaza umusaruro impano zarwo no guteza imbere ubukungu bushingiye ku guhanga udushya.
