Mizero Lambert
Umuhungu ukiga gutereta yakunze umukobwa biramuzonga abura uko yabimubwira, maze yishyiramo akanyabugabo, yishakamo imbaraga, yiyemeza kubimubwira.
Yafashe terefone (telephone), saa tanu za nijoro (23h00) amwandikira ubutumwa bugufi bugira buti: «Ndagukunda cyane, ndifuza ko twakundana, mbabarira umbwire uko ubyumva»!
Hashize akanya gato, yakiriye ubutumwa bugufi kuri terefone (telephone), agira ubwoba bwinshi atinya kubufungura, yiyemeza kwiryamira akazabusoma mu gitondo.
Bwarakeye arabyuka arasenga, akora uturimo twa mugitondo, yoza amenyo, aroga anarya ibya mu gitondo, ubundi ajya kureba bwa butumwa bugufi.
Yafashe terefone (telephone) afite amatsiko n’ubwoba by’inshi hafi yo gutitira, ubundi ajya aho asomera ubutumwa bugufi asanga ubutumwa bugufi bwari buje buragira buti: «Mukiriya mwiza nta mafaranga ahagije mufite yo gusoza iki gikorwa, nimushyireho amayinite, mwongere mugerageze».
