HARAGIRIMANA Dieudonne
Nyuma y’igihe kirekire bivugwa ko ikipe ya Arsenal ishaka kugura abakinnyi b’imbere bakomeye kugirango izabashe guhanagana no kureba uko yatwara ibikombe byose izitabira muri uyu mwaka w’imikino 2017/2018, umutoza Arsene Wenger yatangiye kureba uko yakumvikana n’ikipe ya Fc Barcelona kugirango arebe uko yayivanamo umukinnyi wabuze umwanya maze nawe akabaha uwo bari kwirukankaho bikomeye.
Inkuru izindukiye ku kinyamakuru El Mundo Deportivo iravuga ko Arsene Wenger yatangiye kugirana ibiganiro by’ubwiru n’ubuyobozi bw’ikipe ya Fc Barcelona kugirango barebe uko bagurana abakinnyi babo aribo Hector Bellerin umunya Espagne ushobora gusubira mu rugo i Catalunya ari naho yakuriye ndetse n’umunya Turukiya Arda Turan. Nkuko iki kinyamakuru gikomeza kibivuga, Arsene Wenger arifuza ko aba bakinnyi baguranwa gusa ikipe ya Fc Barcelona ikazongeraho Miliyoni 26 z’amapound kugirango batange Hector Bellerin nabo bahabwe Arda Turan bityo uyu musaza akazongeraho izindi Miliyoni 15 z’amapound agahita aguramo myugariro w’ikipe ya Monaco Benjamin Mendy.
Ibi bintu biramutse bibaye akaba ari ibyashimisha bikomeye abafana ba Arsenal kuko icyuho cya Hector Bellerin cyazakurwamo n’uyu mufaransa w’imyaka 23 Mendy wafashije ikipe ye kwegukana igikombe cya champiyona y’abafaransa.
