THIERRY Mugiraneza
Rayon Sports FC yatangaje ko yakiriye Umunya-Guinea Conakry, Alsény Camara Agogo, rutahizamu mushya w’imyaka 28.
Mu gitondo cyo kuri uyu wa Kane, tariki 23 Ugushingo nibwo Rayon Sports binyuze kuri Instagram yatangaje ko yakiriye umukinnyi mushya ukomoka muri Guinea Conakry.
Uyu mukinnyi bigaragara ko afite imyaka 28 y’amavuko kuko yavutse tariki 04 Mutarama 1995. Afite uburebure bwa 1.83 cm, ni rutahizamu wuzuye, full striker, cyangwa abo bita ba nimwero 9, akaba akinisha ukuguru kw’ iburyo.
Urugendo rw’uyu rutahizamu:
Transfer Market ivuga ko muri 2015 aribwo yatangiye gukina bya kinyamwunga ubwo yakinirag Kaloum FC y’iwabo.
2016 yakiniraga ikipe ya Hassania FC yo muri Morocco nyuma y’uko yari yamuguze € 50, 000. Hassania FC yayikiniye umwaka umwe maze muri 2017 yerekeza mu ikipe ya Holoya FC y’iwabo muri Guinea Conakry.
Mu mwaka w’imikino wa 2020/202, Alsény Camara yagarutse mu ikipe ya Kaloum FC yari yarakiniye muri 2015.
Mu Kwezi kwa Mata muri 2021, Camara yagiye gukinira ikipe ya ASAC Diambour yo muri Senegal .
Muri 2022, Alsény Camara yagumye muri Senegal akinira ikipe ya Sacré- Coeur ayivamo mu mwaka ushize ajya gukinira ikipe ya Guédiawaye FC n’ayo yo muri Senegal .
Mu ikipe y’Igihugu ya Guinea yakinnye imikino 11, atsinda ibitego bibiri.
Uyu rutahizamu w’imyaka 28 aje mu ikipe ya Rayon Sports nyuma y’uko ba rutahizamu yari ifite barimo Mussa Esenu na Charles Bbaale babuze ibitego.
