Intambara hagati y’abakeba aribo Real Madrid na FC Barcelona bapfa umwana w’imyaka 16

Mw’ijoro ryakeye ni bwo Fc Barcelona yatsinze Real Madrid nyuma y’igihe kirekire itayitsinda, ku bitego 3-1 ndetse ihita yegukana igikombe cya Super Cup yo muri Espagne, uyu mukino wakiniwe muri Saudi Arabia.

Nubwo Fc Barcelona yaraye itsinze Real Madrid mu kibuga ariko bari no mu ntambara yo kurwanira umukinnyi ukiri muto ukomoka muri Argentine witwa Gianluca Prestianni. Uyu mwana ufite impano idasanzwe akina muri Club Atletico Velez Sarsfied yo ikina mu cyiciro cya mbere muri Argentine.

Umwana uri gutuma Real Madrid na Fc Barcelona zirara zidasinziriye zitekereza uburyo zamugura

Gianluca Prestianni ni we mukinnyi wa 3 wakinnye muri shampiyona ya Argentine ari muto, ni nyuma ya Diego Maradona na Sergio Aguero. Ubuhanga agaragaza mu kibuga ni bwo buri gutuma ashwaka cyane n’amakipe 2 akomeye akina muri shampiyona ya Espagne nubwo atari yafata umwanzuro w’aho azerekeza. Nk’uko tubikesha Marca, Real Madrid na Fc Barcelona zose zamaze kugera kuri uyu mwana.

Uyu mukinnyi ukina anyura ku ruhande mu ikipe ye amaze gukina imikino 2 ariko ntabwo aratsinda igitego naho mu ikipe y’igihugu ya Argentine y’abatarengeje imyaka 17 yakinnye imikino 5 atsinda ibitego 2. Muri Argentine hasanzwe hava impano zikomeye z’abakinnyi bakiri bato barimo nka Enzo Fernandes na Julian Alvarez bigaragarije mu gikombe cy’isi cya 2022 cyaberaga muri Qatar.

Umukinnyi w’imyaka 16 utazi aho azerekeza hagati ya Real Madrid na Fc Barcelona zimushaka