Geovanis
Umusore w’imyaka 23 Adrian Kwiatkowski, ni we wari umutekamutwe wibye indirimbo z’umuhanzi Ed Sheeran akazigurisha zitarasohoka yakatiwe gufungwa amezi 18.
Uyu musore w’imyaka 23 yibye indirimbo ebyiri za Ed Sheeran zari zitarasohoka ndetse n’izindi 12 z’Umuraperi Lil Uzi Vert, azigurisha ku rubuga rucururizwaho indirimbo mu buryo butemewe.
Uyu musore yacuruzaga izi ndirimbo hanyuma akishyurwa mu ifaranga ry’ikoranabuhanga rizwi nka ’cryptocurrency’ nkuko BBC dukesha iyi nkuru yabitangaje.
Uyu mutekamitwe yakoresheje uburyo bwose bushoboka kugira ngo agere kuri izi ndirimbo yifashishije imbuga z’abo bahanzi zose yinjiriraga ntawe ubizi.
Polisi yo mu Mujyi wa Londres mu bwongereza yatangaje ko uwo musore yafashwe amaze kwinjiza £131.000, asaga miliyoni 131 Frw.
Mu 2019 ni bwo inzego za Leta Zunze Ubumwe za Amerika zishinzwe Ubugenzacyaha zatangiye iperereza kuri uyu musore. Ni nyuma y’uko bamwe mu bahanzi bagannye Ubugenzacyaha bwa New York bagaragaza ko hari umuntu utazwi wiyise Spirdark wabinjiriye, akiba indirimbo agatangira kuzigurisha.
Ubwo imashini ye yafatwaga, basanzemo indirimbo zisaga 500 acuruza atabyemerewe. Iperereza ryakozwe ryagaragaje ko uwo muntu abikorera mu Bwongereza.
Mu bindi byafatiwe mu rugo rw’uwo mutekamutwe, harimo indirimbo zitarashyirwa hanze z’abahanzi zigera ku 1260 z’abahanzi 89.
