Akari ku mutima wa Marcus Rashford nyuma y’uko baraye bandagajwe na Liverpool

Marcus Rashford, rutahizamu w’ikipe ya Manchester United yagiye ku rubuga rwe rwa Twitter agaragaza akamuri ku mutima nyuma y’uko baraye bandagajwe.

Mu ijoro ry’ejo ku Cyumweru nibwo ikipe ya Manchester United yari yasuye Liverpool ku kibuga cyayo.
Manchester United yaje kuhahurira n’ishyano kuko iyo kupe yanyagiwe umuba w’ibitego 7 ku busa.

Liverpool yabifashijwemo na Darwin Núñez, Cody Gakpo na Mohamed Salah batsinze ibitego bibiri buri umwe ndetse na Roberto Firmino watsinze kimwe , maze bandagaza Manchester United.

Rashford utaragize umukino mwiza kimwe n’abandi bakinnyi bose ba United, yagiye ku rukuta rwe rwa Twitter maze yandika amagambo asa nk’uwisegura ku bakunzi ba Manchester United ndetse anatangaza ko urugendo rugikomeza.
Marcus Rashford yanditse ati ” Nakwifuje ko twagakinnye umukino uyu munsi , tukagerageza gushyira ibintu ku murongo. Umusaruro ni umusaruro, ntidukwiye guheranwa n’ibyabaye. Ntidukwiye kureka ngo bisobanure umwaka wacu. Dufite kwizera urugendo tugakorera hamwe”.