Social Mula
Ku wa Gatandatu tariki 18 Gashyantare 2023, Saa Cyenda n’igice z’amanywa kuri Stade ya Bugesera ikipe ya Gasogi United izaba yakiriye Rayon Sports mu mukino w’umunsi wa 20 wa shampiyona y’Icyiciro cya Mbere umwaka w’imikino wa 2022-2023.
Ikipe ya Rayon Sports iri mu bihe byiza nyuma yo gutsinda mucyeba APR FC, kuva uyu munsi imyitozo bazayikorera mu Karere ka Bugesera mu rwego rwo kwimenyereza Stade bazakiniraho.
Abafana ba Rayon Sports bemereye agahimbazamusyi Heritier Luvumbu nabasha gutsinda ibitego cyangwa agatanga umupira uzavamo igitego, ku rundi ruhande Essomba Leandre Willy Onana arifuza kuzatsinda ibitego bitatu (hatrick) bigendanye n’uko ari kubikora mu myitozo.
Urutonde rw’abakinnyi 11 Haringingo Francis Christian azabanza mu kibuga
Umuzamu : Hakizimana Adolphe
Ba myugariro : Mucyo Didier’Junior’, Ganijuru Elie, Mitima Isaac na Rwatubyaye Abdul ©.
Abo hagati : Ngendahimana Eric, Mbirizi Eric na Raphael Osaluwe Olise.
Ba rutahizamu : Heritier Luvumbu Nzinga, Joachiam Ojera na Essomba Leandre Willy Onana.
Umuyobozi w’ikipe ya Gasogi United amaze iminsi akubita agatoki ku kandi avuga ko azatsinda Rayon Sports nk’uko yabikoze mu mukino ubanza wabaye tariki 23 Ukuboza 2022 ubwo Gasogi United yatsindaga Rayon Sports igitego kimwe ku busa cyinjijwe na Malipangou Theodore Christian.
Ku rutonde rw’agateganyo rwa shampiyona y’Icyiciro cya Mbere, ikipe ya Gasogi United iri ku mwanya wa gatatu n’amanota 36 aho ikurikirwa na Rayon Sports zinganya amanota zigatandukanywa n’umubare w’ibitego zizigamye.
