Umutoza w’ikipe y’abafana benshi mu Rwanda yahagaritswe nyuma yo gutsindwa umukino wa shampiyona

Umutoza w’ikipe ya Kiyovu Sports, Alain Andre Landeut yamaze guhagarikwa igihe kitazwi nyuma yo gutsindwa n’ikipe ya Gasogi United mu mukino wa shampiyona y’Icyiciro cya Mbere mu Rwanda umwaka w‘imikino wa 2022-2023.

Ku gicamunsi cyo kuri iki Cyumweru ikipe ya Kiyovu Sports yari yacakiranye na Gasogi United, umukino ukaba warangiye Gasogi United inyagiye Kiyovu Sports ibitego bitatu kuri kimwe.

Nyuma y’uyu mukino umuyobozi wa Kiyovu Sports, Mvukiyehe Juvenal yabwiye umutoza Alain Andre Landeut ngo mu gitondo aze kuza gufata ibaruwa imuhagarika ku biro by’iyi kipe.

Gutsindwa uyu mukino kuri Kiyovu Sports byatumye iguma ku mwanya wa kabiri n’amanota 21 mu mikino 11 ya shampiyona, irushwa na Rayon Sports inota rimwe.