Dore udushya tudasanzwe tuzabera mu gitaramo “One Love Manchester” cya Ariana Grande

Ariana Grande Butera agiye kongera gutaramira mu Bwongereza mu gitaramo yise ‘one love Manchester’ kigamije guha icyubahiro abaguye mu gitero cy’iterabwoba ndetse n’imiryango yabo kizaba ku cyumweru taliki ya 4 Kamena 2017.

Muri iki gitaramo Ariana Grande agiye gukora,harimo udushya twinshi. Agashya ka mbere ni uko abari bitabiriye icy’ubushize bazinjirira ubuntu. Akandi gashya kazaba muri iki gitaramo ni uko umuntu ufite igikapu icyo ari cyo cyose atazemererwa kwinjira.

Nyuma y’icyumweru kimwe habaye igitero cy’iterabwoba mu gitaramo cye i Manchester,umuhanzikazi Ariana Grande agiye  kongera gukorera igitaramo mu Bwongereza mu rwego rwo guha agaciro abasaga 19 bahasize ubuzima ndetse na 59 bahakomerekeye. Ariana Grande mu magambo yuzuye intimba yanditse ku rukuta rwe rwa twitter yagize ati: “Ntacyo nakora cyangwa undi wese yakora kugira ngo mbakize akababaro,umutima wanjye,amasengesho yanjye ndetse no kubihanganisha biri kumwe n’abagezweho n’ingaruka za kiriya gitero n’abo bakunda (…).” 

Biravugwa ko Ariana Grande muri iki gitaramo azafatanya n’abandi bahanzi harimo Katy Perry, Miley Cyrus, Justin Bieber n’abandi.