Amafoto: Abahanzi nyarwanda Juno Kizigenza n’umwami w’amajyepfo bakoreye amateka i Bujumbura ubwo binjizaga abarundi muri 2023

Mu ijoro ryo ku wa 31 Ukuboza 2022 rishyira ku wa 1 Mutarama 2023, abahanzi barimo Davis D na Juno Kizigeza bifatanyije n’abatuye Umujyi wa Bujumbura mu gitaramo bise ’Happy People’, cyaherekeje umwaka urangiye, giha ikaze umushya.

Ni igitaramo cyagaragayemo ubufatanye bukomeye hagati y’abahanzi bo mu Rwanda ndetse n’ab’i Burundi, ibi bikaba bitandukanye cyane n’ibimaze iminsi bivugwa mu itangazamakuru no ku mbuga zitandukanye ko abahanzi b’i Bujumbura batishimiye abaturuka i Kigali kuko barya amafaranga bagahawe.

Muri iki gitaramo cyabereye ahitwa Zion Beach, abahanzi Drama T na Alvin Smith b’i Burundi nibo babanje ku rubyiniro.

Nyuma yo gusoza hahise hahamagarwa Juno Kizigenza na we wafashe umwanya uhagije asusurutsa abakunzi be b’i Bujumbura.Uyu musore wari utaramiye bwa mbere i Burundi, yaje kwibutsa abafana be ko afite amaraso yo muri iki gihugu kuko ariho se umubyara avuka.

Nyuma ya Juno Kizigenza hakurikiyeho Davis D wari utegerezanyijwe amatsiko menshi kuko nawe ari ubwa mbere yari agiye gutaramira i Bujumbura.

Uyu muhanzi ukunze kwiyita umwami w’abana cyangwa umwami w’amajyepfo, umwanya we ku rubyiniro yawumaze abyinisha abakobwa bari bitabiriye iki gitaramo ku bwinshi.
Ni urubyiniro Davis D yamazeho hafi amasaha abiri abyinana hasi hejuru n’abakunzi be bari bamwishimiye ku rwego rukomeye.
Amafoto