THIERRY Mugiraneza
Ikipe ya Bayern Munich isanzwe ikina shampiyona y’ikiciro cya mbere mu Bugade ( Germany Bundesliga) yasanze ikipe ya Paris Saint Germain iwayo iyitsinda igitego kimwe ku busa mu mukino ubanza wa ⅛ muri Champions League.
Mu ijoro rya keye abakunzi b’umupira w’amaguru ku isi bari bongeye kuryoherwa n’ijoro ry’imikino ya Champions League dore ko itari iherutse. Champions League yari yagarutse hakinwa imikino ya ⅛ aho ku ikibitiro ikipe ya Paris Saint Germain yari yakiriye ikipe ya Bayern Munich kuri stade ya Parc des Princes.
Christophe Galtier waburaga Kylina Mbappe kuko yari ataramera neza mu mubiri yari yabanje mu kibuga abakinnyi nka
Donnarumma, Hakimi, Marquinhos, Ramos, Nuno Mendes; Zaïre-Emery, Verratti, Danilo Pereira; Carlos Soler; Messi na Neymar.
Mu gihe Julian Neglesmann we yari yabanje mu kibuga Sommer,Cancelo, Upamecano, De Ligt, Pavard; Kimmich, Goretzka; Sané, Musiala, Coman na Choupo-Moting.
Paris Saint Germain yaje gukubitwa igitego kimwe ku munota wa 53 gutsinzwe na Kingsley Coman ahawe umupira na Alphonso Davies wari winjiye mu kibuga asimbuye Joao Cancelo.
Galtier yagerageje gukora impinduka zitandukanye yinjiza mu kibuga abakinnyi nka Presnel Kimpembe, Kylian Mbappe, Fabián Ruiz na Vitinha ariko igitego kirabura ndetse n’igitego babonye ku munota wa 82 gutsinzwe na Kylian Mbappe, VAR iracyanga ngo yari yaraririye.
Umukino urangira Bayern Munich itsinze igitego kimwe ku busa ndetse inahabwa ikarita y’umutuku yahawe Benjamin Pavard ku munota wa 92.
