Abakinnyi 10 bahize abandi mu gutsinda hat-tricks nyinshi mu kinyejana cya 21

Mu mupira w’amaguru si ibisanzwe gutsinda ibitego 3 mu mukino umwe ibi bihabwa izina rya hat-trick mu mukino umwe ibi ni nabyo bituma ubashije kubikora ahabwa igihembo cyo gutahana umupira (ballon) yakinwe kuri uwo mukino.

Muri iyi nkuru tugiye kugaruka ku bakinnyi 10 batsinze hat-tricks nyinshi muri shampiyona 5 za mbere zikomeye ku isi, mu marushanwa yose muri rusange harimo n’amakipe y’ibihugu. Kuri uru rutonde rw’abakinnyi 10, abakinnyi 3 muri bo basezeye kuri ruhago mu gihe abandi bagikina.

10. Ednson Cavani

Cavani ni rutahizamu ukomoka muri Uruguay w’imyaka 36 y’amavuko. Yakiniye amakipe arimo Napoli, Paris Saint Germain, Manchester United na Valencia mu gihe kuri ubu ari umukinnyi wa Boca Juniorsyo muri Argentine. Mu mikino 779, Cavani yatsinze hat-tricks 15.

9. Kylian Mbappe

Mbappe ni rutahizamu w’umufaransa w’imyaka 24 y’amavuko. Yakiniraga AS Monaco mbere yo kujya muri Paris Saint Germain ari nayo akinira kuri ubu. Mu mikino 402, Mbappe amaze gutsinda hat-tricks 15.

8. Zlatan Ibrahimovic

Ibrahimovic yari rutahizamu ukomoka muri Suede, kuri ubu afite imyaka 42 y’amavuko gusa yasezeye kuri ruhago. Ibrahimovic yakiniye amakipe arimo Malmo FF, Ajax Amsterdam, Inter Milan, Juventus, AC Milan, FC Barcelona, Manchester United, Los Angeles Galaxy na Paris Saint Germain. Mu mikino 773 Zlatan Ibrahimovi yakinnye yatsinze hat-tricks 17.

7. Sergio Agüero

Agüero ni rutahizamu w’imyaka 35 y’amavuko gusa wamaze gusezera kuri ruhago kubera ibibazo by’uburwayi. Agüero ukomoka muri Argentine yakiniye amakipe arimo Atletico Madrid, Manchester City na FC Barcelona. Mu mikino 730 Agüero yakinnye yatsinze hat-tricks 18.

6. Mario Gómez García

Gómez yari rutahizamu w’umudage gusa ubu yazeye kuri ruhago muri 2020, kuri ubu afite imyaka 38 y’amavuko. Gómez yakiniye amakipe yiganjemo ay’iwabo mu Budage harimo Stuttgart, Bayern Munich na Wolfsburg, akinira kandi amakipe arimo Fiorentina yo mu Butaliyani na Beşiktaş yo muri Turukiya (Turkey), yakiniye kandi ikipe y’igihugu y’Ubudage imyaka 11 yose ni ukuva 2007-2018. Mu mikino 557 Gómez yakinnye yatsinze hat-tricks 18.

5. Harry Kane

Kane ni rutahizamu w’umwongereza w’imyaka 30 y’amavuko. Nyuma yo kumenyekanira muri Tottehnam Hotsopur kuri ubu akinira ikipe ya Bayern Munich yo mu Budage. Mu mikino 537 Kane amaze gukina yatsinze hat-tricks 19.

4. Luis Suarez

Suarez ni rutahizamu ukomoka muri Uruguay w’imyaka 36 y’amavuko. Kuri ubu Suarez akinira ikipe ya Gremio yo muri Brazil gusa yakiniye amakipe atandukanye yo ku mugabane w’Iburayi arimo Ajax, Liverpool, FC Barcelona na Atletico Madrid. Mu mikino 636 Suarez yakinnye yatsinze hat-tricks 20.

3. Robert Lewandowski

Lewandowski ni rutahizamu w’imyaka 35 y’amavuko ukomoka muri Pologne (Poland). Robert Lewandowski yakiniye amakipe arimo Lech Poznan, Borussia Dortmund, Bayern Munich ndetse kuri ubu akinira ikipe ya FC Barcelona yo muri Espagne. Lewandowski amaze gukina imikino 762 yatsinze hat-tricks 31.

2. Lionel Messi

Messi ni umukinnyi ukina asatira izamu w’imyaka 36 y’amavuko ukomoka muri Argentine kuri ubu ukinira ikipe ya Inter Miami. Mu makipe yo ku mugabane w’Iburayi Messi yakiniye FC Barcelona na Paris Saint Germain. Mu mikino 1031 Lionel Messi yatsinze hat-tricks 57.

1. Cristiano Ronaldo

Cristiano Ronaldo ni rutahizamu w’imyaka 38 y’amavuko ukomoka muri Portugal ukinira ikipe ya Al Nassr yo muri Saudi Arabia. Ronaldo yakiniye amakipe y’Iburayo arimo Sporting CP, Manchester United, Real Madrid na Juventus. Ronaldo niwe uyoboye uru rutonde rw’abakinnyi bamaze gutsinda hat-tricks nyinshi, mu mikino 1121 Ronaldo yakinnye yatsinze hat-tricks 60.

Aba nibo bakinnyi 10 ba mbere bamaze gutsinda hat-tricks nyinshi mu kinyejana cya 21 cyatangiye mu mwaka w’2000 muri shampiyona 5 za mbere, amarushanwa yose no mu makipe y’ibihugu.