Uwari umutoza wa Man United yagiye muri Ipswich Town

Uwari umutoza wungirije muri Manchester United, Kieran McKenna yerekeje muri Ipswich Town asimbuye Paul Cook.

Kieran McKenna w’imyaka 35 y’amavuko yakoze nk’umutoza wungirije muri Manchester United mu gihe cya Jose Mourinho na Ole Gunnar Solskjær, ndetse ntabwo yigeze atakaza akazi ke mu gihe iyi kipe yazanaga Ralf Rangnick.

Mbere yuko ashyirwa mu batoza b’ikipe ya mbere, Kieran McKenna yatozaga abatarengeje imyaka 18 y’amavuko ba Manchester United.

Paul Cook wahoze atoza Portsmouth na Wigan Athletic yirukanwe nyuma y’amezi icyenda mu kazi, aho yatsinze imikino ibiri mu mikino icyenda yaherukaga gukina.

Ipswich Town yazanye John McGreal nk’umutoza w’agatenganyo, aho iyi kipe yatsinzwe umukino umwe, inganya umukino umwe muri League One, mbere yo gutsindwa na Barrow ibitego 2-0 mu kiciro cya kabiri cya FA Cup ku wa Gatatu.

Biteganyijwe ko umukino wa mbere McKenna azatoza muri iyi kipe ihagaze ku mwanya wa 12 ku rutonde rwa shampiyona y’ikiciro cya gatatu hariya mu Bwongereza, uzabahuza na Sunderland iri ku mwanya wa Gatatu ku wa Gatandatu.