Mikel Arteta yatangaje ko adateganya guhindura ibitekerezo k’umuzamu w’ikipe y’Arsenal

Hashize ukwezi kurenga umutoza Mikel Arteta w’Arsenal ahinduye umuzamu wa mbere w’iyi kipe, David Raya niwe usigaye ubanza mu izamu mu gihe Aaron Ramsdale asigaye yarabaye umusimbura.

Ku mukino Arsenal iheruka kunganyamo na Chelsea ibitego 2-2 muri shampiyona y’Ubwongereza Premier League, David Raya yakoze amakosa yavuyemo igitego cya 2 ndetse yakoze n’andi makosa yashoboraga kuvamo ibitego. Ibi nibyo byatumye Arteta abazwa ku bijyanye no kuba yakongera guha amahirwe Aaron Ramsdale.

Kuri uyu wa mbere ubwo yari mu kiganiro n’itangazamakuru mbere y’umukino wa UEFA Champions League Arsenal yakirwamo na FC Sevilla; Arteta yabajijwe ibyo kongera guhindura umuzamu maze avuga ko gukora amakosa bibaho muri ruhago, mu magambo ye yagize ati;”Amakosa abaho mu mupira w’amaguru. Kiriya ni igitutu cyo gukinira ikipe ikomeye. Uba ugomba gutsinda kandi ugakina neza kandi uba ufite undi uri guhanganira umwanya nawe.”

Aya magambo ya Arteta ahamya ko amakosa David Raya yakoze ku mukino wa Chelsea atariyo yatuma ahita amuvana mu izamu ngo asubizemo Aaron Ramsdale.