Social Mula
Ikipe ya Marine FC ibarizwa mu Karere ka Rubavu mu Ntara y’i Burengerazuba ikomeje kwitegura umukino w’umunsi wa kane wa shampiyona y’Icyiciro cya Mbere umwaka w’imikino wa 2022-2023 aho izacakirana na Rayon Sports.
Uyu mukino uzaba ku wa Gatandatu tariki 1 Ukwakira 2022 Saa Cyenda z’amanywa ubere kuri Stade Umuganda, impande zombi zikaba zifuza kuzegukana amanota atatu.
Ikipe ya Marine ibinyujije ku rubuga rwa Instagram yatangiye gutera ubwoba Rayon Sports iyibwira ko yiteguye kuzayitsinda itayibabariye nk’uko yabikoze mu mwaka ushize w’imikino ubwo yayitsindaga umukino ubanza n’uwo kwishyura.
Marine FC ku rubuga rwayo yagize iti “Murakaza neza ku butaka bwacu musanzwe mwarahaririye amarira menshi tubaye tubateguje ko muzakomeza kurira andi marira mu mukino uzaduhuza ku wa Gatandatu twiteguye kubatsinda tutabababariye”.
Iyi kipe itozwa na Rwasamanzi Yves yahise inatangaza ibiciro byo kwinjira kuri uwo mukino aho muri VVIP ari ibihumbi 15, VIP ni ibihumbi 10, ahatwikiriye ni ibihumbi bitanu mu gihe ahasanzwe ari ibihumbi bibiri by’Amanyarwanda.
Umukino uhuza Marine FC na Rayon Sports aba ari umukino w’ishiraniro, mu mwaka ushize w’imikino ikipe ya Marine yanyagiye Rayon Sports ibitego 3-0 mu mukino ubanza mu gihe uwo kwishyura Marine FC yongeye gukora mu jisho Rayon Sports iyitsinda ibitego 3-2.
Aya makipe yombi agiye guhura aho Rayon Sports iri ku mwanya wa kabiri n’amanota 9 n’ibitego bine izigamye aho byose ibinganya na Kiyovu Sports, Marine FC yo iri ku mwanya wa 13 aho ifite inota rimwe mu manota 9 imaze gukinira.
Kuri uyu wa Kane tariki 29 Nzeri 2022, Rayon Sports irerekeza mu Karere ka Rubavu, mu bakinnyi izakoresha ntabwo barimo myugariro w’ibumoso Ishimwe Ganijuru Elie umwanya we ukaba uzakinwamo na Muvandimwe Jean Marie Vianney.
