Burya umuntu ava kure koko: Umwana watoraguwe yenda kwicwa n’inzara akomeje guca ibintu kubera impano idasanzwe afite(AMAFOTO).

Umuririmbyi yarivugiye ati”ntahantu kure Imana itagukura”.Ibi nibyo byabaye ku mwana wiswe Hope watoraguwe yenda gushiramo umwuka nyuma yo kujugunwa n’ababyeyi akomeje guca ibintu ndetse akomeje kuvugisha benshi bitewe n’uburyo asigaye asa.

Hope yatawe n’ababyeyi be mu gace kitwa Eket muri Nigeria bamushinja ko ari umurozi,n’umutera mwaku ndetse ko nta kintu bagezeho nyuma yo kumubyara.Hanyuma yaje gutoragurwa n’umuzungukazi witwa Anja Ringgren Lovén aramujyana aramurera none uyu mwana amaze kuba mukuru ,ateye amabengeza.Uyu mwana rero akaba kandi ngo afite impano yo gushushanya cyane nk’uko tubikesha ikinyamakuru the Mirror.

Madamu Anja wamureze yagize ati “Hope yari amerewe nabi cyane ubwo twamutabaraga.Yari yaragaburiwe nabi ndetse arwaye indwara nyinshi.Mu byumweru 2 ari kwa muganga,yari amerewe nabi ku buryo twibazaga niba azakira cyangwa azapfa.”

Anja amaze imyaka 8 afasha abana batawe n’ababyeyi babo aho kuri ubu afite 300 barimo na Hope.Muri aba bana harimo 76 bo mu bihugu byo muri Afurika y’Iburengerazuba biganjemo abakobwa batotejwe,abasambanyijwe n’abashyinguwe ari bazima n’ababyeyi babo gito.

Kuva muri 2016,Hope yitaweho n’uyu muryango washinzwe na Madamu Anja ndetse kuri ubu wamujyanye mu ishuri aho ngo afite impano ikomeye yo gushushanya ndetse nkuko amafoto abigaragaza,uwari ugiye gupfa ubu yarahindutse bikomeye.

Anja yagize ati “Hope afite ubuzima bwiza kandi yatangiye kujya ku ishuri.N’umuhanga cyane ndetse akunda cyane gushushanya no guhimba ibintu bishya.Afite impano idasanzwe mu gushushanya ndetse n’ibishushanyo yakoze byatangiye kugurishwa.Ubu dusigaye tumwita Picasso muto.”