Social Mula
Umunyamakuru w’ikigo cy’Itangazamakuru cya Radio/TV10 Rwanda, Kazungu Clever yavuze ko ikipe ya APR FC ishobora kuzanyagira Rayon Sports ibitego bitatu ku busa.
Ejo ku Cyumweru tariki 12 Gashyantare 2023, ikipe ya APR FC izakira Rayon Sports mu mukino w’umunsi wa 19 wa shampiyona y’Icyiciro cya Mbere umwaka w’imikino wa 2022-2023.
Mu kiganiro Urukiko rw’Imikino cya Radio 10 cy’ejo ku wa Gatanu tariki 10 Gashyantare 2023, Umunyamakuru w’imikino Kazungu Clever yavuze ko ikipe ya APR FC ishobora kuzatsinda Rayon Sports ibitego bitatu ku busa bigendanye n’uko Ikipe y’Ingabo z’Igihugu iri mu bihe byiza.
Uyu munyamakuru impamvu nyamukuru ashingiraho avuga ko APR FC ishobora kuzatsinda Rayon Sports ibitego bitatu ku busa, ni uko Gikundiro imaze imikino irindwi ikurikiranya batazi uko gutsinda Gitinyiro bimera.
Rayon Sports iheruka gutsinda APR FC tariki 21 Mata 2019, icyo gihe yayitsinze igitego kimwe ku busa cyabonetse ku munota wa nyuma gitsinzwe na Michael Sarpong kuri penaliti nyuma y’ikosa Imanishimwe Emmanuel myugariro wa APR FC yakoreye kuri Mugisha Gilbert wari mu rubuga rw’amahina.
