Epaphrodite Nsengimana
Mu bushakashatsi bwakozwe Umujyanama mu gukora Imibonano Mpuzabitsina akaba Umwanditsi ndetse n’Umwarimu wa ‘Yoga’, Psalm Isadora, yemeje ko hari amoko y’urusenda agira uruhare mu kongera ubushake bwo gukora imibonano mpuzabitsina.
Nk’uko Ikinyamakuru cya Harper’s Bazaar, mu 2015 cyagiye kiti ‘‘Insenda zifitemo ‘Capsaicin’, igira uruhare mu kurema ubushyuhe ikanongera uburyo amaraso atembera mu mubiri n’uburyo ajya mu myanya ndangagitsina y’umugabo akagira ubushake bwo gukora imibonano mpuzabitsina.’’
Capsaicin ni ikinyabutabire kiba mu rusenda, gusa ingano yacyo igatandukana bitewe n’ubwoko bwarwo. Abahanga bagaragaza ko kinagira uruhare no mu kugabanya uburibwe mu mubiri kuri bamwe bitewe n’uburwayi bafite nk’uko byemezwa na Dr. Alan Mandell wo mu Kigo cy’Abanyamerika cyita ku Buzima, Veterans Administration Medical Center (VAMC).
Capsaicin yiganje mu moko y’urusenda nka Jalapeño, Serrano, Cayenne, Habanero, Scotch Bonnet, Thai Bird’s Eye Chili, Ghost Pepper na Carolina Reaper, gusa iyo ibaye nyinshi ihinduka uburozi mu mubiri.
Ubushakashatsi bundi bwakorewe ku bantu b’igitsina gabo 114 bari mu myaka iri hagati y’imyaka 18 na 44, bugakorerwa muri Kaminuza ya Grenoble Alpes yo mu Bufaransa, bugatangazwa mu Kinyamakuru Physiology & Behavior mu 2014, bwagaragaje ko ab’igitsina gabo bakunze kurya ibiryo birimo urusenda, bagira umusemburo wa Testosterone mwinshi ugereranyije n’abatarurya.
Uyu musemburo ukorwa n’udusabo tw’intangangabo ndetse n’utw’intangangore, ukagira uruhare mu gutuma imyanya ndangagitsina y’abagabo ikura ndetse ugatuma umugabo agaragara nk’umugabo haba ku isura ndetse no mu myitwarire.
Ndetse kandi ugira uruhare mu gutuma umuntu agira ubushake bwo gukora imibonano mpuzabitsina, abafite muke ugasanga iby’icyo gikorwa ntacyo bibabwiye kuko baba banafite ubwo bushake buke cyangwa nta nubwo bafite.
