THIERRY Mugiraneza
Ikipe ya Rayon Sports yafunguye imikino yo kwishyura ya Championa y’ikiciro cya mbere mu Rwanda itsinda Musanze Football Club ibitego bine kuri kimwe.
Rayon Sports yari yashoje imikino ibanza iri mu manegeka yafunguye , imikino yo kwishyura ikina na Musanze mu mukino wabaye kuri uyu wa kabiri ubere kuri sitade ya Muhanga.
Rayon Sports n’iyo yafunguye amazamu itsinda igitego ku munota wa 13 gitsinzwe na Mitima Isaac. Musanze nayo bidatinze yaje kwishyura iki gitego ku munota wa 19 gitsinzwe na Peter Agblevor.
Igice cya mbere kirangira impande zombi zinganya igitego kimwe kuri kimwe.
Igice cya kabiri cyatangiye ikipe ya Rayon Sports yisize insenda bidatinze ku munota wa 51 Isaac Nsengiyumva wa Musanze yitera igitego kiba kibaye icya kabiri cya Rayon Sports.
Ku munota wa 55 Ngendahimana Eric wa Rayon Sports yateretsemo igitego cga gatatu cya Rayon Sports ku mupira waruvuye muri kufura.
Rayon Sports yari yisize insenda yongeye gutsinda igitego cya kane cyatsinzwe na Musa Esenu wateretseho umutwe ku mupira waruvuye muri koroneli.
Umukino urangira Rayon Sports icyuye amanota atatu mbere yo kwesurana na Mukura Victory Sports mu mukino uzakurikira.
