Epaphrodite Nsengimana
Uwayezu Jean Fidèle uyobora Rayon Sports, ntiyemeranya n’abavuga ko Murera yagize umwaka mubi kuko yegukanyemo ibikombe bibiri bya Super Cup n’icya “RNIT Saving Cup”.
Uwayezu yabigarutseho ku wa Gatandatu tariki 27 Mata 2024, mu muganda rusange wakozwe na Rayon Sports ifatanyije na SKOL.
Yagize ati “Umwaka w’imikino mu Rwanda utangirana na Super Cup twegukanye dutsinze APR ibitego 3-0. Twakinnye CAF Confederations Cup ku bw’amahirwe make dusezererwa kuri penaliti. Hagati twakinnye igikombe cya RNIT nacyo twaragitwaye.”
Uwayezu yavuze ko bagiye gushaka abakinnyi bakiri bato n’abandi bafite ubunararibonye batazakina umwaka umwe gusa kuko nabyo biri mu kibazo kizonga iyi kipe.
Ati “Turashaka kongera kubaka ikipe, tukanashaka abakiri bato bafite imbaraga b’abanyarwanda n’abakinnyi bazi shampiyona bakuze bazafatanya n’abato. Tuzagura abakinnyi beza ariko batari ugukina umwaka umwe gusa ngo bagende kuko icyo nacyo ni ikibazo.”
