Miss Igisabo n’abo bahatanye berekanye ubwiza bw’amasura yabo nta birungo bisize (amafoto)

Uwase Hirwa Honorine uzwi nka Miss Igisabo n’abakobwa bahataniye ikamba rya Miss Earth 2017 berekanye ubwiza bw’amasura yabo nta birungo (Make-up) bikabije bisize.

Muri iki kiciro cya ‘Pre-Judging Beauty of Face and Poise’ , Miss Igisabo n’abo bahataniye ikamba biyerekanye imbere y’abagize akanama nkemurampaka nta birungo bikabije bisize kugirango babashe kubagenera amanota hagendewe ku mwimerere wa buri wese.

Iki kiciro ni kimwe mu bitangirwamo amanota azateranywa kuyo aba bakobwa bagize mu bindi byiciro uzahiga abandi yambikwe ikamba rya Miss Earth 2017.

Amahirwe ya Uwase Hirwa Honorine ‘Igisabo’ arabarirwa ku mashyi kuko mu byiciro byose bamaze kurushanwamo nko mu mwambaro wa bikini, kwiyerekana mu mwambaro ugaragaza imiterere no kwiyerekana mu ikanzu ndende byose ntiyitwaye neza.

Iri rushanwa rya Miss Earth , Miss Igisabo arimo ritegurwa buri mwaka riba rifite insanganyamatsiko zitandukanye zihuriye ku kubungabunga ibidukikije , iy’uyu mwaka ni uguhangana n’imihindagurikire y’ikirere. Nyampinga uzegukana iri rushanwa uyu mwaka azatangazwa mu birori bizaba tariki ya 4 Ugushyingo 2017.