HARAGIRIMANA Dieudonne
Umuhanzi Nyarwanda Ngabo Meddy agiye guhatanira ibihembo bikomeye bya MTV Africa Music Awards Kampala 2021 aho azahuriramo n’abandi bahanzi bibihangange muri Africa.
Meddy yashyizwe mu cyiciro ‘Listeners’ Choice’. Ni gishya muri ibi bihembo. Kuko kuva mu Ukuboza 2020, hatangazwa abahanzi bahatanye nticyari kirimo.
Iki cyiciro kiri mu bikunzwe, aho abafana basabwa gutora uwo bashyigikiye. Ni icyiciro kirimo abahanzi bagera kuri 19 bo mu bihugu bitandukanye byo muri Afurika.
Meddy ahatanye na Anna Joyce [Angola], Asaph [Zimbabwe], Dagi D [Ethiopia], DBN Gogo&Dj Dinho [Afurika y’Epfo], Didi B [Cote d’Ivoire], Drizilik [Sierra Leone], Focalistic [Afurika y’epfo], Khaligraph Jones [Kenya], Locko [Cameroon].
Hari kandi Malome Vector [Lesotho], Mohamed Ramadhan [Egypt], Ngaaka Blinde [Senegal], Pallaso [Uganda], Rayvanny [Tanzania], Sarkodie [Ghana], Shirazee [Benin], Slick Stuart&Dj Roja [Uganda], Souhila Ben Lachhab [Algeria] na Tiwa Savage [Nigeria].
Tariki 09 Ukuboza 2020, ni bwo ubuyobozi bwa MTC Africa Music Awards, bwatangaje abahanzi bahize abandi muri Afurika bashyizwe mu byiciro bahatanira ibihembo bizatangwa ku wa 20 Gashyantare 2021, hifashishijwe ikoranabuhanga bica kuri MTV Base (DStv Channel 322).
Abahanzi batandatu bo muri Uganda ni bo bagaragara ku rutonde rw’abahataniye ibi bihembo bitangwa na Televiziyo ya MTV Africa.
Abahanzi bakomeye nka Burna Boy, Busiswa, Davido, Diamond Platnumz, Innoss’B, Kabza De Small, John Blaq, Master KG, Suspect 95, Sheebah, Soraia Ramos, Tiwa Savage, Yemi Alade na WizKid bari mu byiciro bibiri.
Ni mu gihe Calema wo muri São Tomé and Príncipe’s ayoboye urutonde rw’abahataniye ibi bihembo, aho ari mu byiciro bitatu birimo Artist of the Year, Best Group na Best Lusophone Act.
Ibi bihembo bihatanyemo abahanzi 52 bo mu bihugu 15 bashyizwe mu byiciro 10.
