HARAGIRIMANA Dieudonne
Umuhanzikazi akaba n’umunyamideli ukomeye mu gihugu cya Kenya atangaza ko umubiri we ari ubucuruzi bukomeye kandi bumuha agatubutse.Uyu mukobwa akaba kandi avuga ko yatanze amafaranga menshi kugirango agire uburanga bukurura ab’igitsinagabo.
Sidika akaba yarigaruriye imitima y’abagabo batari bake barimo n’ibyamamare kubera ikimero cye.
Kuri Instagram ye yitwa ”queenveeboseet” abamukurikira ni miliyoni imwe n’ibihumbi magana acyenda. Indirimbo ya mbere yagaragayemo ni iyitwa “You Guy” yo mu 2012 y’itsinda P- Unite ryakanyujijeho mu minsi yashije mu ndirimbo zitandukanye nka “Kare” n’izindi. Yegukanye igihembo nk’inkumi yahize abandi mu kugaragara neza mu mashusho y’indirimbo muri Africa y’Uburasirazuba.
Ni umuhanzikazi wamamaye mu ndirimbo nyinshi nka “MIMI”, “NALIA”, n’izindi. Yagaragaye kandi muri filime y’uruhererekane yitwa Nairobi Diaries n’izindi nyinshi zakunzwe n’abatari bake yagiye akinamo. Umuntu yavuga ko yatangiye kwamamara afite imyaka 17 amurika imideri y’abantu banini..
Igishitura abantu benshi kandi cyikamwinjiriza amafaranga ni uburanga bwe. Yemera ko ubu buranga atari ubwo yavukanye. Yigeze guhishura ko ubwo yihinduzaga uruhu bitari byoroshye kuko yari agiye kubihuriramo n’ikibazo anahishura ko kujya kubikoresha mu Bwongeraza byamutwaye akayabo ka Miliyoni 15 z’amashiringi ya Kenya, mu mafaranga y’u Rwanda akaba arenga Miliyoni 132.
Vera Sidika yavuzwe mu rukundo n’abagabo batandukanye barimo umuhanzi Otile Brown wo muri Kenya wakoranye indirimbo “Dusuma”na Meddy, Tommy Daniel, Yommy Johnson wo muri Nigeria, Jimmy Chansa, n’abandi benshi kandi bafite agatubutse. Mu minsi ishize aherutse guhakana amakuru yavugaga ko asigaye abana n’umuhanzi witwa Brown Mouzo bivugwa ko ari we basigaye bakundana.
