Yarashwe n’umugabo we ubwo yari ari kwaka gatanya bimuviramo urupfu

Umuhanzikazi Yrma Lydya w’imyaka 21 yarashwe n’umugabo we Jesus Hernandez w’imyaka 79, bimuviramo kuhasiga ubuzima.

Ibi byabereye mu cyumba cyihariye cyo muri resitora y’Abayapani iherereye mu mujyi wa Mexico.

Amakuru avuga ko uyu mugore wari ukiri muto mu myaka yari arimo  gufatira amafunguro mu gace ka Benito Juarez ubwo yicwaga n’umugabo we babanaga.

Hernandez  yarashe umugore we mu gituza inshuro eshatu nyuma yo gutonganira mu cyumba cyihariye bari bakodesheje.

Nyuma yo gukora ayo mahano, uyu mugabo n’umurinzi we Benjamin Hernandez bagerageje guhunga gusa ariko baza gufatwa na Polisi.

Amakuru avuga ko Hernandez yahise agerageza guha ruswa abapolisi ngo bamureke.

Ibi kandi byabaye nyuma y’uko uyu mugore yari yaramaze guvugana n’ikigo gitanga gatanya, aho yavugaga ko ahohoterwa n’umugabo we.