Moïse Habanabashaka
Uretse kuba ari n’umukire agira n’umutima wo gufasha: Ibyo Alliah Cool yakoreye abakobwa babyariye iwabo byashimangiye ubugiraneza bwe.
Isimbi Alliance wamamaye nka Alliah Cool, ku wa 7 Werurwe 2023 yifatanyije n’abaturage bo mu Karere ka Gatsibo mu kwizihiza umunsi mpuzamahanga wahariwe abagore, yishyurira ubwisungane mu kwivuza abakobwa 50 batewe inda zitateguwe ndetse n’abana babo.
Ni igikorwa cyabereye mu Murenge wa Rugarama ho mu Karere ka Gatsibo, ahari hateguwe ubukangurambaga bwo kurengera umwana no kumurinda ihohoterwa, bufite insanganyamatsiko igira iti “Turengere umwana twubake u Rwanda twifuza.”
Mu kiganiro yagejeje ku bitabiriye iki gikorwa, Alliah Cool yibukije abari muri iyi nama gusenyera umugozi umwe bakarwanya inda zitateguwe zikunze guterwa abangavu.
Kandi yasabye abakobwa batewe inda zitateguwe kurenga ibivugwa, abasaba gushyira imbaraga zose mu kubaka ejo hazaza habo baharanira kugera ku nzozi zabo.
Uretse Ubwisungane mu kwivuza, yishyuriye ababyeyi bahuriye mu muryango wa ‘Her voice Rwanda’ telefone eshanu zikoresha ikoranabuhanga, bajya bifashisha mu gusangizanya amakuru.
