Umutoza Ben Moussa ahangayikishijwe n’abakinnyi bane ngenderwaho muri APR FC basubiye inyuma ku buryo bukomeye bitewe no kudashyira umutima ku kazi

Umutoza mukuru w’ikipe ya APR FC ahangayikishijwe na myugariro w’iburyo Omborenga Fitina, rutahizamu usatira aciye mu mpande witwa Mugisha Gilbert na ba rutahizamu babiri bo hagati aribo Mugunga Yves na Nshuti Innocent.

Hashize igihe bivugwa ko abo bakinnyi basubiye inyuma bitewe n’uko basa naho biraye bakarekeraho gukora cyane kugira ngo bazamure urwego rw’imikinire.

Amakuru yizewe twamenye ni uko umutoza Ben Moussa yasabye abakinnyi bose kongera imbaraga kugira ngo bahatanire ibikombe byombi bikinirwa mu Rwanda, gusa abo yasabye kurushaho kongera imbaraga ni Mugunga Yves, Mugisha Gilbert, Nshuti Innocent na Omborenga Fitina.

Ikipe ya APR FC yicaye ku isonga ku rutonde rw’agateganyo rwa shampiyona y’Icyiciro cya Mbere umwaka w’imikino wa 2022-2023 aho ifite amanota 34, umukino ukurikira izacakirana na Sunrise FC mbere yo guhura na Rayon Sports tariki 12 Gashyantare 2023.