Social Mula
Ubuyobozi bwa APR FC bwamaze guhagarika umutoza mukuru w’iyi kipe, Adil Erradi Mohammed bitewe n’imyitwarire amaze iminsi agaragariza ubuyobozi bw’ikipe.
Amakuru agera ku kinyamakuru YEGOB ni uko uyu mutoza yamaze gushyikirizwa ibaruwa imuhagarika ku mirimo ye mu gihe cy’iminsi 30.
Ibi bibaye nyuma y’amagambo yatangaje mu itangazamakuru ku wa Gatatu w’iki cyumweru yibasira bamwe mu bakinnyi b’iyi kipe.
Ibi kandi bikaba byaraje byiyongera ku kuba yari amaze iminsi atumvikana n’ubuyobozi bw’iyi kipe kubera ko hari ibyo bwamubwiraga gukora we ntabyumve.
Mbere y’uko ahagarikwa umutoza Mohammed Adil Erradi yabwiye ubuyobozi bwa APR FC ko umukinnyi umwe rukumbi witwa Itangishaka Blaise ari we ufite ikinyabupfura abandi bose bamugambaniye.
Abakinnyi bakaba bahise bahamagarwa bajya mu mwiherero wo kwitegura Police FC umukino uzaba ku wa Mbere tariki ya 17 Ukwakira 2022, ikaba igiye kuba itozwa n’umutoza wungirije Ben Moussa.
Muri iyi kipe kandi haravugwamo impinduka zikomeye zishobora gusiga Buregeya Prince agizwe Kapiteni mushya wa APR FC agasimbura Manishimwe Djabel wari ufite izo nshingano mbere y’uko ahagarikwa ukwezi .
