HARAGIRIMANA Dieudonne
Nyuma y’igihe kinini umukino w’intare FC na Rayon Sports bitangajwe ko ugomba kuba, ntabwo birizerwa neza ko uraza kuba.
Hashize igihe ikibazo cya Rayon Sports n’Intare FC, kigarukwaho mu itangazamakuru ndetse no mu ishyirahamwe ry’umupira w’amaguru hano mu Rwanda FERWAFA kubera amakosa iri shyirahamwe ryakoze Intare FC ntibabyumvikaneho.
Intare FC baje gutanga ikirego muri FERWAFA basaba ko Rayon Sports yaterwa mpaga kubera iyi kipe yari yikuye mu irushanwa ariko ikongera ikagarurwa nta gihe giciyemo, iki kirego ntabwo cyakiriwe neza bahise basubiza iyi kipe ko umukino ugomba gukinwa.
Nyuma y’uyu mwanzuro hahise haba inama yahuje amakipe yombi na FERWAFA kubera ko Intare FC yongeye kwandika, ariko baza gutegeka ko umukino ugomba kuba tariki ya 19 Mata 2023. YEGOB twamenye ko uyu mukino ushobora kutaba bitewe ni uko ubuyobozi bw’Intare FC kugeza ubu ntamwanzuro burafata.
Amakuru YEGOB ikesha Radio 1, avuga ko ubwo iyi Radio yaganiriye n’umwe mu bayobozi b’iyi kipe, yabatangarije ko ikipe yiteguye ariko ngo ntabwo barafata umwanzuro ku kuba uyu mukino uraba cyangwa ntube bivuze ko turategereza kugeza igihe bashyizeho ugomba kubera.
Byari biteganyijwe ko uyu mukino uraba ku isaha ya saa cyenda z’amanwa kuri uyu wa gatatu, ubere kuri Sitade ya Bugesera FC. Umukino ubanza warangiye ikipe ya Rayon Sports itsinze Intare FC ibitego 2-1.
