Umukinnyi ukomeye yakinnye umukino wa mbere muri gereza nyuma yo gutabwa muri yombi

Myugariro w’umunya Brazil wanyuze mu makipe akomeye harimo na Barcelona, yakinnye umukino wa mbere muri gereza nyuma y’uko atawe muri yombi.

Daniel Alves da Silva wamenyekanye nka Dani Alves, amaze icyumweru atawe muri yombi aho ashinjwa guhohotera umugore, kuri ubu afungiwe muri gereza ya Brians 2 iherereye i Barcelona muri Esipanye.

Mu gie ategereje kuburana, uyu mugabo yongeye kugira amahirwe yo guconga ruhago muri iyi gereza hamwe n’abagororwa bagenzi be, nk’uko ikinyamakuru Marca cyabitangaje.

Nta byinshi bizwi ku buryo uyu mukino waba wagenze cyangwa uko yitwaye, icyamenyekanye ni uko uyu mukino wabaye kuwa 4 w’icyumweru gishize.

Uyu mugabo w’imyaka 39 kuri ubu yakiniraga Pumas yo muri Mexico, gusa iyi kupe yahise imwirukana akimara gutabwa muri yombi.