Sobanukirwa birambuye uburyoki abanyamideli bari guhatanira igihembo bazakurwamo uzatsinda

Abanyamideli 88 batangiye guhatana mu matora yo kuri internet mu gikorwa cyiswe “Rwanda’s Global Top Model”, azasiga hamenyekanye 30 bakomeza mu cyiciro kibanziriza icya nyuma.

Amatora ari kubera ku rubuga rwa Noneho.com, yatangiye kuva kuri uyu wa Kabiri tariki 17 Mutarama 2023 azarangira ku wa 4 Gashyantare 2023.

Kuri uwo munsi nibwo hazaba igikorwa cyo guhitamo abanyamideli 30, bakomeze mu kindi cyiciro (Top 30 Selection). Aba banyamideli 88 bavuye mu 177 biyandikishije binyuze kuri Email.

30 bazakomeza ni abagize amajwi menshi mu itora ryo kuri internet (Most Voted), batanu batoranyijwe n’abafana (Public Choice) ndetse na batanu bahize abandi mu kwiyerekana neza (5 Best in virtual Casting) abandi 15 bazatangwa n’Akanama Nkemurampaka (15 by Judges).

Ndekwe Paulette uhagarariye Embrace Africa iri gutegura iki gikorwa, yavuze ko mu guhitamo abanyamideli 30 bazaha ijambo abafana.

Yavuze ati “Tuzashyiraho uburyo abafana bagira ijambo mu rwego rwo kubaha umwanya wo guhitamo abagomba gukomeza. Hiyandikishije benshi, rero abafana bazahitamo batanu bajya mu kindi cyiciro babona bahize abandi.”